[DABARUN RUBUTUN WAKA RUBUTATTUN WAKOKIN HAUSA] BY MSZ.

 DABARUN RUBUTUN WAKA

   RUBUTATTUN WAKOKIN HAUSA

Kashi na farko

  Daga 

Nasir G Ahmad

Assalamu alaikum.

Wannan shiri, “Rubutattun Wakokin Hausa” zai rika zuwar muku a duk rana irin ta yau (Litinin), don tattauna dabarun rubuta wakar Hausa ga mai sha’awar farawa, da kuma inganta rubuta su ga wanda ke sha’awar kara kwarewa wajen rubuta su. 

A yau shimfida za mu yi, mako mai zuwa in Allah ya kai tai sai mu tsunduma cikin abin sosai.

RUBUTACCIYAR WAKA

 Zai yi kyau mu dauko abin daga tushe, wato daga bayani kan adabin Hausa.

Adabi a dunkule, shi ne duk wani abu da ya shafi ayyukan fasahar al’umma ta hanyar sarrafa harshe don samar da abokin hira, da nishadantarwa da debe kewa.

 Adabin Hausa ya kasu zuwa kashi biyu: adabin baka da rubutacce.

Adabin baka shi ne wanda Hausawa suka gada tun iyaye da kakanni. Shi da ka ake shirya shi, a fade shi da baki, a kuma adana shi a ka. Ya kunshi labarun baka, kamar tatsuniya, da zantukan hikima da sarrafa harshe, kamar karin maganganu, da wakokin baka, da wasannin gargajiya.

Shi kuwa rubutaccen adabi, ya samu ne bayan da Hausawa suka fara hulda da wasu al’ummomin, musamman Larabawa da Turawa. A rubuce ake shirya shi, a bayar da shi a rubuce, a kuma adana shi a rubuce. Ya kunshi rubutun zube (na labarai), kamar Ruwan “Bagaja,” da wasannin kwaikwayo, kamar “Uwar Gulma” da kuma rubutattun wakokin Hausa, wadanda wannan shiri zai rika magana kansu.

   Daga. 

Tsangayar da ta himmatu wajen kulawa da killacewa da taskace abubuwan da suka shafi adabi da zamantakewar al’ummar hausawa

    

   by  Musa s Zage.